2019年1月7日星期一

靚女列傳 之 RTHK兩大女神

  鄙人自問係一位電視精,我諗好多識我嘅人都同意。但應該唔係好多人知道,鄙人最喜歡的電視台,唔係無綫(TVB),亦唔係亞視(ATV),而係香港電台(RTHK)。

   點解我咁鍾意睇RTHK嘅電視節目?原因都有幾個。第一,佢嘅資訊文教節目提供關於香港時事、社會,及其他各方面嘅知識,滿足我對事物的好奇心。第二,佢嘅單元劇充滿人文精神,題材往往都表達出對社會上不同的群體關懷。再者,單元劇通常都係一集過,對冇乜耐性追長劇嘅我,係好唔錯嘅精神食糧。

  想當年,鄙人考完公開試後,等放榜嗰個暑假,一得閑就走去位於港島天后香港中央圖書館6樓,透過多媒體資訊系統,收看昔日的RTHK經典節目。

  當年未有港台電視31的《經典重温》,亦唔似家陣咁,用電腦或電話就可以網上點播。

  印象中,當年嘅我最鍾意揾番某兩位80年代女神主演嘅80至90年代初嘅RTHK單元劇嚟睇。我唔敢講係一部不漏,但至少佢哋一啲演出,使鄙人多年以來也難以忘懷。

  我心目中呢兩位拍過唔止一套RTHK單元劇嘅氣質女神,一位係留住氣質長髮,另一位就留樸素短髮。但無獨有偶,呢兩位女神個名,都係有個“晨”字嘅。

沒有留言:

發佈留言