2018年6月23日星期六

靚女列傳 之 港姐遺珠1998【二】

 (續上篇)

  之前講到,我很喜歡觀賞1998年落選港姐傅楚卉有份演出嘅教育電視。之不過,其實我在小學生的時候,她主演的教育電視應該尚未誕生。而這批教育電視出世之時,我已經是個高年級生了,重看這些低年級教育電視的機會亦不大。一直到了教育電視網上重温版本盛行的年代,我才有幸後睹為快。

  其實,除了當年嘅教育電視之外,楚卉姐姐演古裝劇也值得欣賞!印象之中,楚卉姐姐效力無綫時好像也拍過不少古裝劇。而當中我最最喜愛、覺得最感人嘅,必定是2003年的古裝神怪劇《繾綣仙凡間》。

  《繾綣仙凡間》的故事背景是隋朝,主要講縣官李玄(江華飾演)本來係一個反對迷信、不問鬼神的貴族子弟,但與道有緣的他卻因機緣巧合得到了一本奇書《玄天經》,更見盡了人世間跨越階級、跨越生老病死的堅貞愛情,最後成為八仙之一的鐵拐李。

   而呢齣20集的古裝劇集入面,最感人的單元,都算係李玄好友——新科進士及弟庾若冬(郭耀明飾演)與私訂終身的妻子——落難千金秦凝雪(楊婉儀飾演)的生死之戀!而傅楚卉飾演的永明郡主,則不由自主地牽涉其中。

   話說,庾若冬不負夫人秦凝雪的期望,高中成為“狀元”(事實上,隋朝作為中國第一個開科取仕的年代,是沒有狀元、榜眼、探花、傳臚......等名銜)。新科“狀元”要進宮覲見皇帝,於是太監安排他先在房中等候。正當庾若冬等候期間,見到了一幅字畫,寫道:
 三字同頭官宦家 三字同旁綢緞紗 若非當朝官宦家 誰人配穿綢緞紗

  庾若冬一時技癢,便隨手拿起伏在案上的毛筆,於紙卷上題上:
 三字同頭夢芳華 三字同旁結紅紗 日夕魂繞夢芳華 千里一綫結紅紗

   在庾若冬剛題好此下聯時,永明郡主剛到達現場。看着墨迹還未乾的下聯,永明郡主不禁雙眼發光!原來永明郡主已經苦思了七日七夜也對不出此聯,怎知庾若冬竟能在不消一盞茶時間便能解題!見到此副妙極的對聯,永明郡主不但難禁喜悅之色,更因庾若冬的才情而對其心生傾慕!
 

 



  永明郡主的皇叔——漢中王楊宗(魏駿傑飾演)看在眼裡,感覺到永明郡主暗暗單戀庾若冬,便安排庾若冬不日迎娶永明郡主。漢中王這樣做,無非希望自己所疼愛的侄女能夠在自己安排之中獲得幸福。

  但庾若冬早已成家立室,心中只有髮妻秦凝雪一人,試問怎能再娶?於是翌日便到永明郡主處修改下聯,藉此表明心迹,拒絕永明郡主的一番好意。






“三字同頭左右友 三字同足逍遙遊 今日幸逢左右友 各奔西東逍遙遊”

   讀罷此下聯後,冰雪聰明的永明郡主當然明白箇中意思。對於庾若冬的拒絕,她亦不願意強求,只好人前強裝堅強,背人卻獨立黯然神傷。



  而庾若冬拜別了永明郡主後,便離開京城(隋朝的都城應該是大興城,即現在陝西省西安市附近),準備衣錦還鄉,與賢妻重聚。

   但事情又怎會這樣容易便解決呢?太后(梁舜燕飾演)及漢中王亦因庾若冬拒婚兼一走了之而震怒。事關太后及漢中王實在很疼愛永明郡主了,當然會為她的終生大事緊張。

   而事實上,永明郡主雖然貴為金枝玉葉,但她的身世也有其可憐之處。話說永明郡主是太后其中一位兒子的女兒,但太后這位兒子及其妻子很早便已離世。自幼便已痛失怙恃的永明郡主是跟隨着太后在宮中長大的,所以得到宮中各成員的憐愛及關顧。再加上永明郡主身體比較虛弱,所以太后就更加對她事事憂心。

   真是好事多磨!另一邊廂,可憐這賢妻秦凝雪,未及等待鳳冠霞帔,便因積勞成疾,與世長辭!天意弄人,庾若冬悲痛莫名!真箇:

未償恩情情已散
欲温前夢夢經殘
燕辭巢 剩孤樑
流水逝 空餘悵
  這位獨守着孤墳,無處話淒涼的庾大人,只能憑着詩句直抒胸懷:

伯牙碎琴成絕唱 琴斷新弦難續上
 寧玉碎 拋將相 伴知音 甘斷腸

    而最令人驚訝的是,憶妻成狂的庾大人竟然改變心意,願意迎娶永明郡主為妻。於是,庾大人到達位於益州的王室行宮......


 









  


  永明郡主明白庾大人並非寡情薄倖之人,不相信他真心喜歡自己。她只怕漢中王強人所難,威逼庾大人迎娶自己。



  庾大人答應當郡馬,完全是違心之舉!他的目的,完全是為了獲得一品封誥,獻給亡妻秦凝雪。迎娶郡主後,目標達成,便赴黃泉與亡妻相會!



   亡妻秦凝雪於泉下得悉一切,眼見庾大人自我放棄,於心不忍。但她怎能還陽,勸解她的夫君呢?



莫教伯牙成絕唱 琴斷新弦再續上
步青雲 拾將相 休回首 休斷腸



  凝雪藉着修改夫君的詩句表達心迹,希望夫君能回心轉意,珍惜生命,達成為官的理想,為百姓謀幸福。但人鬼殊途,豈能訴說衷腸?昔日,李玄是促成若冬與凝雪良緣的媒人;今日,凝雪只能對李玄作出種種啟示,讓李玄知悉她有心願未了。



  唯一讀到凝雪心聲的李玄,憑着《玄天經》的指引,得悉一枚稱為“圓魄明珠”的宮廷寶物能夠讓凝雪還陽三個時辰。為了獲得“圓魄明珠”,讓若冬得悉凝雪的心願,李玄與好兄弟程咬金(樊少皇飾演)決定闖入益州別苑偷取“圓魄明珠”。



  結果,程咬金事敗被捕。漢中王大為震怒,更企圖用弓箭射殺咬金。李玄指腹為婚的未婚妻裴翠雲(楊思琦飾演)情急之下,竟以身擋箭,身受重傷......



  無辜的翠雲以身擋箭受重傷,暗戀她的漢中王於心不忍,便放過程咬金,並命宮中太醫全力搶救翠雲。


  翠雲於行宮內養傷,身子逐漸康復。郡主很欣賞翠雲捨己為人的情操,希望能與翠雲傾吐心事。


  其實,永明郡主應該係虛構人物,事關隋朝是沒有郡主這個稱號的。皇室內的女性,無論是皇帝還是王爺的女兒,都一律稱之為公主。而永明郡主這個角色,很可能就是《二十四史》中,《隋書》裡記載的孝女——永豐公主。

 (此篇尚未完成,待修改。)

2018年6月21日星期四

靚女列傳 之 港姐遺珠1986【一】

(續上篇)

  上集講到,1986年落選港姐夏苡婷拍過電影。佢唔單止拍過電影,更曾被提名過金像獎最佳新人!

佢係憑住動作片《東方禿鷹》入面嘅越共奸細劉順英呢個角色,獲得1988年香港金像獎最佳新人——嘅提名唧。估到佢係乜水未?

  話時話,呢位仁姐個樣係唔係好英呢?冇錯,佢就係夏志珍(Beatrice HAR)。 

2018年6月18日星期一

靚女列傳 之 港姐遺珠1998【一】

 (續上篇)

  話說,我真係好鍾意睇傅楚卉有份演出的教育電視。我所知嘅暫時有6部,當中有4部係小學常識科,2部係小學中文科。大部份都係2001至2003年左右拍嘅。

  話說,楚卉姐姐當年第一部教育電視,相信就是小學五年級常識科《關懷愛滋》了。佢同一位綽號叫“啤梨”嘅電台DJ(定係歌手?)葉文輝一齊做主持。由於呢齣嘢有太多太多的枝節,所以呢兩位主持佔戲並不多。一臉純真善良的楚卉姐姐除咗喺節目內介紹有關愛滋嘅知識外,更充份將節目另一主題“關懷”表現出嚟。
小學常識科《關懷愛滋》劇照。

  另外,楚卉姐姐同無綫藝人李中希亦都一齊拍過兩部性質相近嘅常識科教育電視。點解話呢兩套性質相近?係因為呢兩部分別係《美食天堂》及《口腔健康》,概括嚟講,都係同人體攝取營養有關。對白中有較多資訊及數據,好考主持人嘅記憶力。楚卉姐姐與李中希頗為合拍,兩位主持之間的互動及交流都做得好好!

常識科《美食天堂》劇照。主持人在西貢食海鮮,當中有買少見少嘅海鱟,同埋聽都未聽過嘅跳螺。

  常識科教育電視大多是資訊性為主,節目內的主持,技巧上較為着重將資訊清晰地帶俾觀眾。我敢寫包單,楚卉姐姐完全係交足功課! 

  第一,楚卉姐姐講嘢把聲好清晰。這可能係佢嘅聲綫比較嬌俏,比較耐聽。另外,講對白嗰陣口形比較明顯(相反,有啲姐仔講對白嗰陣唔願擘大個口,會導致發音欠清楚)。加上,楚卉姐姐嘅發音尚算準確,懶音算是不多。佢對於後鼻音韻母嘅發音處理得好好,好清晰(千禧年打後,唔知點解有好多人係處理唔到後鼻音韻母,搞到“恒生銀行”變咗“痕身銀寒”)。當然,發音上也有少許的不完美,例如輔音弱化問題(例如將“佢”的輔音/聲母由[k]弱化成[h]),以及圓唇音偶然不能完美地發出來(例如“國”讀成“角”)。如果將這些小問題加以改善,咁發音上就相當完美了。
小學常識科《美食天堂》劇照。因乜解究講述香港人食幾多魚嗰陣要揸住條魚?


  第二,就係同對手嘅交流。當拍檔講解嘅時候,楚卉姐姐總是細心傾聽的樣子,眼神總是閃出渴望對方解說問題的期待,表達一種好想求知嘅感覺。而拍檔一講到重點嘅時候,就會認同地用力點頭(楚卉姐姐點頭時有點前傾,簡直是獨家標記,非常可愛!)當疑問解開時,面上又會流露那種解開疑難嘅興奮。嗰種感覺真係好難形容,大概是那種愛學習、好奇心重、求知欲強嘅人,總是會散發出呢種感覺啩?這種感覺並不太常見,亦唔會喺每位演員身上能夠發現。
常識科《口腔健康》劇照。見到啲橙橙綠綠有數字嘅燈,相信都唔難估到地點就係學童牙科保健中心了。

  至於中文科教育電視,拍攝手法帶差異,比較側重於故事性,節目中嘅演員要將劇本演出來。這對無綫藝員訓練班出身、身為無綫演員嘅楚卉姐姐,當然就係綽綽有餘!

   楚卉姐姐拍過2齣小學中文科教育電視,佢哋分別為《初學筆順》及《寓言的智慧》。佢哋的風格各不相同,楚卉姐姐表現的風采也各有不同。

  喺《初學筆順》入面,楚卉姐姐飾演一班小女孩的老師,在公園入面講故事,兼夾引導嗰班小女孩玩耍時亦要守筆順規則。楚卉姐姐表現得親切隨和,十足十大姐姐咁款。
小學中文科《初學筆順》劇照。

   《寓言的智慧》由數位港姐擔綱演出,除了傅楚卉,還有1999年港姐陳玟希(即係《無頭東宮》飾演馮可兒嗰位)及 2001年港姐季軍朱凱婷;之不過,佢哋3位港姐係冇任何對手戲嘅。呢齣嘢喺短短15分鐘內,介紹了數個中國傳統警世寓言,分別為朱凱婷主演嘅《掩耳盜鐘》、傅楚卉主演嘅《偷雞人》、陳玟希主演嘅《畏影惡迹》,以及由不知名童星主演嘅《守株待兔》。但不約而同嘅係,佢哋3位港姐當年都很年輕,但卻飾演中童的母親!

  在《偷雞人》故事中,首個場景設定於古代。一位小伙子患上了偷雞的惡習,被一位村姑(傅楚卉飾演)發現。村姑對小伙子諄諄善誘,教導佢偷竊是錯的行為,並勸他改過。怎料呢位盜竊成癖的小伙子卻話唔能夠將惡習立即戒除,只能夠逐漸減少偷雞的次數,直至一年後才可完全把惡習戒除。這使村姑感到啼笑皆非。
傅楚卉於中文科教育電視《寓言的智慧》中,故事《偷雞人》入面那位發現偷雞事件嘅村姑。

  而第二個場景,就是村姑及偷雞人投胎到現在,成了一對母子。一天早上,兒子賴床,母親就開玩笑咁鼓勵兒子起床。怎料兒子喺朝早應承母親夜晚早啲瞓,但嗰晚又掛住睇電視唔願瞓,要母親義正詞嚴咁教訓兼熄電視先至無奈地走去瞓。
故事嚟到現代,母子叫兒子唔好掛住瞓而唔願起身,免得返學遲到。
兒子夜晚掛住睇電視唔願瞓,母親要佢即刻瞓,唔俾睇電視。

  其實,雖然呢個出自《孟子》嘅寓言實屬老生常談,但我卻不感悶場,事關個故事由楚卉姐姐演繹,實屬神來之筆!觀乎楚卉姐姐的外貌、聲綫,一舉手一投足都帶古典氣質,擅長演繹斯文柔弱及善良的角色,楚卉姐姐在教育電視內演這個古裝村姑,簡直就是頂呱呱誇啦啦嘅演出!村姑發現雞舍出亂子時嘅機敏,以及得悉村內小伙子犯錯後嘅寬容,都完美無暇地表現出來!而當年未為人母嘅楚卉姐姐,亦能夠恰如其份地把母親嘅角色演繹出來,帶俾人一種時而慈愛、時而威嚴嘅感覺。

   隨住時光嘅飛逝,楚卉姐姐逐漸於熒幕消失。令人驚喜的是,2015年新版常識科教育電視《節約能源》,又可以見到久違的身影了。已為人母的楚卉姐姐比起當年真是成熟了不少,但那嬌俏的清晰聲綫,以及當年的清純氣質,卻絲毫未有半分褪色。

   呢個節目使戲劇嘅方式演繹,描述一個家庭如何在衣、食、住、行方面節約能源。楚卉姐姐飾演兩個男孩嘅母親,在生活上對孩子諄諄善誘,教導孩子們別無故浪費能源。同時,呢位母親又係一位帶點冒失嘅嬌妻,曾經試過開冷氣唔記得閂窗,要丈夫成日提點。丈夫更要求佢使用冷氣時加強通風以減少製冷量。這使妻子抵受不住丈夫的囉唆而大發嬌嗔。

   對於我個人而言,是頗為喜歡呢個節目。事關鄙人從事屋宇建備這行業,所以對節能、空調、通風等題材會較為敏感。當然,呢個小學生教育電視節目未足以讓鄙人學得更多,但不得不承認,節目內容對小朋友而言,是非常有教育意義的。而最奧妙嘅係,楚卉姐姐N年前主持嘅《美食天堂》曾推測未來的烹調方法會較多用電器,而N年後嘅《節約能源》竟對此遙遙呼應,鼓勵煮食時善用各式節能的電器,會比傳統明火烹調手法更節能。
小學常識科《節約能源》劇照。
小學常識科《節約能源》劇照。

   楚卉姐姐能夠多姿多彩的演藝生涯拍咗咁多部教育電視,真是錦上添花。學童們是幸福的,因為有這個充滿熱誠嘅演藝人員將知識加添色彩,使學習變得輕鬆愉快。雖然我已是個超齡觀眾,但我也深深被楚卉姐姐演出教育電視時那熱切的眼神觸動。空餘時能夠享用這些藝術與教育意義並重嘅精神食糧,足以令我樂上半天,感到無比滿足。真的很希望在未來的日子,能夠再觀賞楚卉姐姐主演嘅教育電視節目,亦希望楚卉姐姐可以再將佢嘅才華發揮!

 (下回續)

2018年6月14日星期四

靚女列傳 之 港姐遺珠1998【序】

  大部份嘅藝人,不外乎運用 聲、色、藝 嚟吸引fans;但喺鄙人心目中,有種藝人嘅優點並不限於此。例如,有啲藝人會好似 陳霽平咁樣,會令人“特別注重健康”,事關見到佢,就會多做運動(例如:踩健身單車、玩扭腰機),甚至乎飲啖嘢都只揀“有益有意義”嘅無糖果汁嚟飲。

  鄙人今次所介紹嘅港姐遺珠,係一位能夠激發學習動機及求知欲望嘅女藝人。大家可能第一時間諗起N年前禮拜六下晝4點半播嘅《問問Master Joe》入面,Master Joe嗰位成日着緊身衫嘅得力機械助手AI Rabee'a(楊洛婷)呢?之不過,我嘅《港姐遺珠》系列係唔會講選美嘅三甲得主;所以,真係好sorry,貴為2003年香港小姐亞軍得主嘅AI Rabee'a,當然就唔會係鄙人呢期要介紹嘅港姐遺珠。

  話說,當年《問問Master Joe》首播嗰陣,我已經係一位唔多睇電視嘅預科生了。之不過,我都會一路做功課,一路聽吓電視,所以都對嗰位最鍾意飲熱朱古力(要多奶多糖)嘅Master Joe及極力阻止Master Joe增肥嘅AI Rabee'a,都幾深印象㗎。

  嗰幾年半大不小嘅中學生涯入面,星期六下晝4點半嗰段時間,係無綫電視翡翠台播放兒童節目嘅時間,而我都係留喺屋企做功課兼聽電視居多。而星期六兒童節目入面嘅主持人姐姐,基本上係省鏡過星期一至五《至net小人類》嗰批!例如《Dada Dede 精靈樂園》嘅戚黛黛姐姐,又或者再舊啲嘅《開心小跳豆》嘅陳凱怡姐姐同傅楚卉姐姐。

  話時話,既做過兒童節目,又做過“成人節目”(即係《六合彩》呀)嘅藝人,好似真係得傅楚卉戚黛黛兩位咋喎。爭啲數漏咗亞洲小姐袁潔儀(留意唔係袁潔瑩或者袁詠儀)都好似兩瓣都做勻。咁啱得啱蹺,佢哋3位都係選美出身喎!不過咁,貴為2003年香港小姐季軍嘅黛黛姐姐,老早就過咗檔去亞視,所以佢同潔儀姐姐一樣,都係亞視六合彩女郎。

  至於1998年落選港姐傅楚卉,我諗佢都算係無綫於1997至2001年短短數年間出產嘅六合彩女郎之中,星運最平淡如水的一位:一二綫主角未曾演過,大大小小的娛樂新聞亦從未牽涉過。但偏偏我卻很欣賞她,除了因為覺得她眉清目秀、聲綫温婉動人、演技恰如其份之外,更重要嘅係佢有一種“良師益友”的味道,能激發人的學習動機及求知欲望。為何這位藝人會有呢種特質?就要留待下次推論及分析了。

2018年6月11日星期一

靚女列傳 之 港姐遺珠1986【序】

  話說,呢期禮拜六夜晚22:30,無綫 翡翠台播緊一部名為《三日兩夜》嘅旅遊節目。其實,禮拜六嘅夜晚,我就比較鍾意睇《新聞透視》,又或者香港電台31台嗰啲實況劇或者記錄片,又或者睇《流行經典50年》聽温碧霞姐姐唱懷舊歌;至於呢亭旅遊節目,一向都唔係我杯茶。

  之不過,呢個鐘數,“周姑娘”又未call我,我又冇乜意欲做啲花腦汁又傷神嘅嘢(例如睇書、睇筆記、用電腦、猜謎、寫打油詩等等),夜晚沖咗涼又冇理由做運動又出汗,我不嬲又唔好打機。咁好喇,咁就睇一陣電視先喇,咪睇到呢齣《三日兩夜》囉。

   呢齣旅遊節目呢女主角,乜咁熟面口嘅?佢咪係我當年嘅中學同學鄧議婷小姐?話說,我讀中一嗰陣已經與小姐係同班同學。記得嗰陣同學幾乎係全班最高嘅女仔,當年已經係大人樣;至於個樣同家陣冇乜點變,都係眼大大、嘴唇薄薄咁樣。唯一唔同嘅係,印象中識佢嗰陣,佢留短髮,個髮式有啲似卡通片《美少女戰士》入面嘅藍戰士咁嘅。我重記得中一班主任係教音樂嘅Miss Wong,成日將鄧議婷同學個名叫做“鄧儀婷”。因乜解究個“議”字明明係陽上聲,但又偏偏讀做陽平聲呢?

   到咗中四,雖然同學讀文科,我讀理科,但係上體育堂嗰陣係兩班女仔一齊上嘅。記得一年兩次除咗度高磅重量體脂,更要度埋條腰圍同籮柚,差在唔使度對胸!一班女仔輪流度完之後,就將數據抄响點名紙上。我本身對同學嘅兩圍數字唔太八卦,但咁啱睇到同學將兩圍數字抄低!對一位中四女生而言,佢身材真係頂呱呱誇啦啦,腰夠幼,又有綫條。真係天生食呢行飯!

   咪住先,明明家陣係寫香港小姐,但鄧議婷同學好似唔係選美出身噃?

  其實,我根本就唔係諗住寫佢。之不過佢個朵同我想寫嗰位靚女港姐遺珠個名好似,所以咪攞佢做我篇嘢嘅引言囉。咁查實我要寫邊位仁姐呢?就係1986年落選港姐——夏苡婷。呢位夏苡婷係乜水?佢都叫做進軍過大銀幕㗎!例如1987年由馮淬帆導演、德寶電影公司嘅《歡樂5人組》。

電影《歡樂5人組》嘅電影海報。夏苡婷聯合主演。(圖片來源:《香港影庫》http://hkmdb.com/db/movies/image_detail.mhtml?id=6886&image_id=89797&display_set=big5

  之不過,翻查1986年香港小姐參賽者名單,好似冇一位叫夏苡婷。究竟係乜嘢一回事呢?請待下回分解。

2016年3月26日星期六

靚女列傳 之 女飛魚徐曼華

  早前六合彩高達成億銀獎金,不過就破唔到早幾年嘅紀錄。話說前亞視藝員劉素芳係第一位六合彩女郎,佢重話想返去亞視主持攪珠喎。呢位陳年亞視六合彩女郎搞到我諗起另一位亞視六合彩女郎,之唔係呢位徐曼華小姐囉。
電影《洪福齊天》(1991)劇照。左起:徐曼華夏春秋。圖片來源:來自網絡。

  老老實實,呢位小姐個樣,並唔算太過搶鏡。之不過睇真下,先發覺佢好鬼有野性美!尤其係佢一身古銅膚色,重有修長而肌理分明嘅四肢,真係正到痺噶!

  徐曼華出身自1982年嘅無綫藝員訓練班。佢本來係游泳健將,有“女飛魚”之稱號。佢亦憑住一身精湛泳術,擔演過苗僑偉版《楚留香》嘅水母陰姬一角。

  之不過,佢喺無綫發展平平。過咗幾年,佢過檔亞視,拍過吓劇集,重有,拍住夏春秋做六合彩主持。

  徐曼華熱愛水上活動,除咗游水之外,重玩埋潛水。响某一年嘅亞視台慶,佢夥拍劉丹姜皓文表演水底燭光晚餐。


  到咗90年代,徐曼華作性感發展,例如拍寫真及三級片之類。佢拍嘅寫真,我無緣欣賞,但觀乎其寫真集封面,除了帶俾人性感嘅感覺之外,還能把佢嘅動感及陽光氣息展現,可觀性甚高。
1991年5月號《Playboy中文版》封面。封面人物:徐曼華。圖片來源:台灣拍賣網站《PChome Online商店街》。

  至於佢擔正女主角嘅電影,我最深印象嘅由王振仰導演嘅《同床2夢》(1994),由三禾國際影視有限公司出品。劇情講述徐曼華飾演嘅女主人翁與其同性戀人在山澗雙雙被強姦,其同性戀人更被歹徒殺害,女主角報仇等一連串故事。除了情色鏡頭外,還有唔少拳腳及鎗戰場面,非常精彩。

  而最精彩的場面,莫過於喺前半部分,徐曼華與女伴於溪澗深水處暢泳之餘,更表演高難度動作,一邊踩水影,一邊打茄輪!像《倩女幽魂》般在水中閉氣打茄輪並唔難,但在水面維持住呢個咁激情嘅動作,難度甚高!激情之餘,不得不為之讚嘆!

  我並不鼓勵大家觀賞情色電影,但呢齣《同床2夢》嘅劇情張力與動作都處理得不錯。徐曼華的才能(特別是其運動細胞)亦得以充份發揮!全片連結:https://www.youtube.com/watch?v=1wCegtaYKFs

2015年11月8日星期日

“臭檔”事件簿

  日前,網上流傳一個有關“臭檔”女人發爛渣的故事。話說呢位女士同佢個同居男友越吵越大鑊,竟然將男友嘅saxophone“硜”落地。呢個saxophone原來係男友嘅先父所贈之遺物,對其意義重大。咁大家話喇,單嘢點收科先?

  我心諗,情緒管理係人生大課題;情緒控制失當,不但誤人誤己,甚至抱憾終生。發脾氣好多人都試過,但“臭檔”到要郁手郁腳嘅,不論理由如何,終究係理虧嘅。

  話說,將男朋友嘅樂器作為洩憤工具嘅女仔,我第一個就諗起嘅係夢中女神袁潔瑩

  袁潔瑩姐姐當年同音樂人徐日勤拍拖。當年潔瑩姐姐年少氣盛,當然會同男友吵大鑊,更狼死到將男友嘅琴扑爛。

  之不過,單靠扑爛男友嘅搵食架罉嚟“發脾四”,技術含量未免太低了。潔瑩姐姐發爛渣嘅套路,可謂層出不窮。真不愧我鍾意潔瑩姐姐佢咁多年,就連發脾氣都有佢嘅一套藝術!

呢個雜誌封面喺網上摷來,出處已忘記。謹此向版權持有人致謝。而雜誌內容,我暫無緣閱讀。

  發爛渣第一式──牛噍牡丹。乜學似絕情谷公主公孫綠萼咁樣食花,原來都係個發脾氣嘅好方法喎。之不過,修煉之前,要好好惡補一下有關有毒植物嘅知識(http://baike.baidu.com/view/39745.htm)。如果俾着我有個咁樣嘅女朋友,發起“狼戾”嗰陣鍾意食花嘅話,我會種炮仗花,一來諗住“諦”下佢好似食咗炮仗咁好火,二來無毒,三來都叫做有啖花蜜啜下。

  牛噍牡丹都還好,最怕發起爛渣上嚟成盆花兜嘢車埋嚟,到時就唔慌唔“鬼食泥”!所以,都係要“摸摸髻諗諗計”,研究下“水耕種植”最實際。咁樣“落地開花”嗰陣都唔係抹地抹得咁閉翳。

  之不過,研究下“水耕種植”好喇,千祈唔好讕醒搞埋晒“魚菜共生”至好。不論菜根下面嘅魚毛仔幾咁得意都好,一個發爛渣嘅女人係絕對唔識憐香惜玉,隨時成兜嘢都俾佢掃落地。如果唔覺意有一兩條魚毛仔彈咗入梳化底,到年尾大掃除時就發現梳化底有條乾屍,都咪話唔“慄”!

  發爛渣第二式──潑水,絕對係上佳發泄良方。首先,水的比熱容量高,對帶走熱能好有幫助。一個人就算點樣發晒滾,清涼嘅水唔多唔少幫到佢降降火。再者,潑水算係玩耍嘅一種。雖然當初係發爛渣性質,但潑潑下就變咗玩,嬲啲乜都唔再需要記得。所以,發脾氣時潑水(當然唔係鏹水)都唔錯,點都總好過郁手郁腳吧。

  發爛渣第三式──扯爛自己件衫,重點係自己件衫。如果扯爛對方嘅衫,就即係開片,亦都係最差嘅發惡方法。但如果係扯爛自己件衫呢就唔係咁講喇,尤其係好似潔瑩姐姐咁索嘅女仔扯爛自己件衫呢,俾着我就當堂熄晒火,兼且順晒佢意,事關已經完全屈服於美色之下了。

  潔瑩姐姐雖然係幾“巴辣”,但如果講到“牛精”呢,就點都唔及呢位仁姐,事關呢位仁姐發起“狼戾”上嚟,真係會“抦鑊金”噶!

  話說,早排我喺一個不經意嘅情況下,喺台灣玉女胡慧中姐姐個《百度貼吧》入面,發現咗一個名為《【开扒】一代打女们》(http://tieba.baidu.com/p/3058049122)嘅貼,一直鍾意打女嘅我就睇得津津有味。殊不知爬到7樓嗰陣,竟然睇到一段難以置信嘅八卦,原文摘錄如下:
大岛由加利和郑浩南以前是情侣,在片场因为郑浩南对别的女生关心了一点,就暴打他……

動作電影《新龍爭虎鬥》(1992)截圖

  據講呢鑊嘢係由另一位台灣打女楊麗菁爆出嚟嘅,除此以外卻搵唔到任何嘅實質證據。俾我就唔多信喇,不論喺理智與情感角度都係咁話。從理性角度諗,雖然大島姐姐喺女仔之中算係幾好打嘅,但係鄭浩南嘅身手都唔錯,而且大隻過大島姐姐咁多,點會冇得打呀?從情感角度睇,我欣賞嘅日本女星真係冇乜邊幾個,數來數去都淨係得佢,所以唔想自己欣賞嘅女星有咁大嘅缺憾。不過就算單嘢係堅嘅都冇壞,事關都可以證明一樣嘢:有吸引力嘅女仔,好多時都好“臭檔”。就正如臭豆腐咁,明知係臭到冤,但卻甘之如飴。為咗食鹹魚,幾渴都抵得住頸。

  至於我,雖然毫不吸引,但仍很“臭檔”,有時會忘記管理好自己,像頭蠻牛亂衝亂撞。

  話說我屋企棟大廈搞緊大型換lift工程,所以最近搭親lift都有排等。有時我唔會等,取而代之嘅係跑樓梯。運滯(送lift尾)嘅時候很多,有時也會怨恨新lift不如舊,無論行駛速度及指令傳達方面亦如是。有時我趁lift駛近本層時及早扲lift,但這指令卻被無視,升降機未有及時停下。在此情況下,我會心生怨恨,並狠狠地踢lift門!平時一個人等lift嘅時候,我有時會跳起,凌空在着地之前用雙腳踢牆壁兩下,作為取樂。但我生悶氣的時候,只會直踢,完全沒有招式可言,全為發洩。事後,我會後悔,後悔會否嚇到lift內的人、後悔會否令機件損耗……

  我深知亂發脾氣的禍害,所以近年的臭脾氣已收歛不少。如果我可以將偶爾來犯嘅踢lift門惡習完全戒掉,我會好好勉勵自己一番,讓自己日後做得更好。此外,從前我還有很多衰衝動發脾氣的大小事件,回想起來全都於心有愧,故不作敍述……

  至於我有冇因為別人大發雷霆而被震撼?答案係肯定嘅。這要回想起十年前的初中生涯了。


[下集續]

2015年10月19日星期一

靚女列傳 之 東洋首席美女【前奏】

今年是中國抗戰勝利暨世界反法西斯勝利70周年,各大媒體都以不同的角度演繹日本的血淚史。我對這些題材很感興趣,也多番被這段歷史震撼過!我對軍國主義、法西斯主義、帝國主義、殖民主義等等,都深痛惡絕,皆因這全是損人而利己、與正義相違背的事!所以,今時今日仍有人高舉“龍獅旗”,提倡港英殖民政權復辟,我真的不理解,亦完全不敢苟同!

但世事就如同天秤一樣,不能過分向另一邊走。有些人因為國家被日本侵略,便仇視日本一切的事物。有些人罷買貨;有些人則歧視日本人,認為他們的道德水平比我們低;更有甚者,龍剛導演的電影《廣島28》(1974年上映),描述原子彈帶來的遺害,卻被扣上“媚”的帽子。上述一些人的觀點,於我看來,是有失偏頗的。每個人都無法控制自己的出生、選擇自己的國籍;生出來是日本人,並不代表是壞人。應該反對的,是日本的軍國主義,而不是日本人。君不見“在華日人反戰同盟”?反對侵略、捍衛和平,是人類的共同願望!

在我小時候,電視台常常播放日本紀錄短片《日本風情畫》,作為節目與節目之間所謂“間場”之用。年少的我,也會為遊走於創新與傳統兩端的日本文化着迷。長大後,我也嘗試運用互聯網等媒介,記誦文“字母”,即是“平假名”(Hiragana)及“片假名”(Katakana)各50個,合稱為“五十音”(Gojuon)。有時會邊吃着美味的“愉快動物餅”,邊把包裝盒上的文動物詞彙“囫圇吞棗”一番。另外,對防災資訊略感興趣的我,甚至曾經幻想過,有朝一日會到島國接受世界首屈一指的防災教育。我對日本文化的欣賞,主要是出於“師夷之長技”這一點。

至於曾經流行一時的日本偶像,其實基本上,我也沒有怎樣留意。相信很多認識小妹的人都知道,我很喜歡欣賞美女。我欣賞美女,從不在乎她的年齡與種族,而是在乎她的美貌。可能我眼角高,對很多東瀛美人視而不見吧。當然,只有外在美,就即是一個花樽,不值得在本網誌《理例真》中大筆一揮。所以,我所欣賞的美女,一定要有內在美!

我最喜歡看港產片,印象中有不少的外籍人士成為產片中重要的一員,而且當中大都分都可說是“有番兩度散手”的。男演員之中,最出位的都要算是倉田保昭KURATA Yasuaki)了。至於女演員呢,有於1985年憑《皇家師姐》踏足香港影壇、來自花旗國的羅芙洛Cynthia ROCKROTH);同年,東洋健美女將西脇美智子(NISHIWAKI Michiko)於電影《福星高照》中大show肌肉。這些外籍兵團們──請恕我未能一一盡錄──他們每人都各有才能與優點,才能在香港影壇站得住腳。

之不過,“任憑强水三千,我獨取一瓢飲”,我最為鍾情的東瀛女打星,卻只有一位。

1985年現身產片的兩位東西方女將羅芙洛西脇美智子,也是50後。翌年,即1986年,一位比她們年輕數載的60日本美少女亦憑着矯健的身手,來參演了一齣大堆頭賀歲動作片。而這位日本美少女,更成為8090年代,產動作片的活躍人物。

[待續]

2015年8月12日星期三

靚女列傳 之 鄭艷麗首部錄影帶電影

  1991年,入行3年的鄭艷麗決意離開無綫電視,向電影圈進發。當年,成為艷星絕非她的本意。

  與無綫電視完約後,她與新達寶影業公司簽經理人約。當年,她在新達寶拍的電影,縱使不是什麼大製作(當中甚至只是一些不上映而只發行錄影帶的電影);但她的演出全是正正經經的,絕對不用犧牲色相。

  根據《香港影庫》,鄭艷麗新達寶時期拍了5部片。首2部是沒有上畫的錄影帶電影,分別為1991年的《天使風雲》及1992年的《愛在明天》。而另外3部公映的就是1992年的《俾鬼玩》及《踩過界》,以及1993年的《末路狂花》。

  鄭艷麗的第一部錄影帶電影《天使風雲》是警匪片。這齣電影由日本靚女打星大島由加利領銜主演,飾演深受上司器重的警隊明日之星阿玲。而鄭艷麗擔演第二女主角Jenny,亦即是女主角的表妹,是個貪威識食的無知少女。故事內容講述Jenny與朋友得到免費去馬來西亞去旅行的機會,但其實是被壞人利用從馬來西亞運毒回香港,被逮捕後慘被判死刑;而作為表姐的阿玲則用盡一切努力營救逃獄回Jenny

  第二女主角Jenny的心路歷程,在鄭艷麗的精湛演技下,完全發揮得淋漓盡致!

  在此,我亦要為一直非常欣賞的大島由加利可惜。大島由加利並不是第一次演女主角,但之前的擔任第一女主角的電影,少不免被其他主角瓜分不少戲份;像《天使風雲》般由頭帶到尾、戲份全以她為中心點的,還是頭一回。這個角色十分討好,是個正直兼且重感情的好警察,除了保留她一貫的硬朗形象及矯健的身手,還加入不少文戲及內心戲,以及從前較少接觸的感情戲。這齣戲可說是為她度身訂造!可惜的是,即使她身為全最好演技的外籍打星(我說的),但強中自有強中手,大島由加利的文戲演繹,遜於比她年輕的影壇新人鄭艷麗
大島姐姐的演技不錯,但一山還有一山高。

  在戲的前段,Jenny是個驕縱、愛結識男生的女孩,有不少老老嫩嫩的男人約她食飯、購物、卡啦OK。正經八百的表姐阿玲苦口婆心地勸告Jenny不要玩出火,Jenny卻調侃表姐缺乏戀愛經驗,不及自己懂得玩男人。


  受不少男士追捧的Jenny更被人邀請免費到馬來西亞遊埠,並托她把乾貨海味運到馬來西亞。機警的表姐頓時生疑,把這些乾貨海味檢查,發現沒有問題,便只好放行,並千叮萬囑Jenny萬事小心。這時的Jenny一心只想着玩樂,作為一個成年人,其警覺性未免大低了。
甘草演員許思敏(中)飾演阿玲(右)的母親、Jenny(左)的姨媽。

  在馬來西亞的酒店,Jenny與朋友互相調侃,怎樣調戲馬拉男人,縱然是朋友之間的開玩笑,但也未免有點輕浮。
Jenny一邊吸烟,一邊與朋友調侃。

  臨近回程,Jenny又受托把榴槤糕從馬拉運回香港,在缺乏表姐的提點下,這回終於出事了!

  過關時,Jenny與朋友們嘻嘻哈哈地調侃,取笑馬來西亞邊防人員如何木獨,完全不知大禍臨頭。直到邊防人員把榴槤糕當着她們的面折開兩邊,中間的白粉隨即傾瀉,她們再也笑不出來了。

  很快地,這幾位無辜的少女,就被馬來西亞當局判處死刑。Jenny當場崩潰!
發軟蹄

  爆骨(開閘)聲響起,亦意味着喪鐘被敲響!
“我唔要死!”
絕望哀號
掙扎、昏厥

  女主角大島由加利的身手,固然不在話下;但其實鄭艷麗的身手亦不錯!這場戲是講述被押赴刑場的Jenny拚死逃離獄警之魔掌。


  成功逃脫後,Jenny便偷偷潛入一艘返香港的船,慘被船員輪姦!幸好亦成功逃回香港

  經過兩表姐妹各自的努力與掙扎,她們重逢了!Jenny淪大馬通緝犯,大馬刑警馬利奧麥德羅飾)奉命把Jenny帶回大馬。為了保着小命,Jenny無奈地藏匿在鄉郊故居。Jenny只好把一切的希望交給表姐,努力搜查證據為她平反。
重逢、痛哭
  阿玲經過一番努力,惜仍未能找到證據。Jenny落難多時,開始崩潰。
仍抱有希望的阿玲(左)鼓勵Jenny(右)振作。

  其後,Jenny馬利奧尋獲。Jenny不願跟馬利奧回大馬,拼命反抗。幸好阿玲及時趕到,並說服馬利奧給她一天時間找尋証據,以証Jenny之清白。此段就不截圖了。

  事情急轉直下,案中唯一証人被殺。馬利奧只好奉命把Jenny帶回大馬。無辜的Jenny絕望非常,甚至邏輯混亂:一邊說自己不想死,一邊卻說自己沒有希望,最後更拾起地下的手鎗,飲彈自盡!
絕望的眼神
飲彈自盡

  故事隨着鎗聲一響作結。最後鏡頭為阿玲欲救無從之表情。


  我會不日繼續在《靚女列傳》介紹鄭艷麗的其他作品;至於大島由加利,作為扶桑國首屈一指的靚女,我當然不會放過她,將來一定會寫她的!